الرئيسية 10 المتابعات 10 24 ساعة 10 قصيدة الحزن النبيل

قصيدة الحزن النبيل

 

 

بقلـــم

الشاعر الصحفى/ خالد امين

الحـــزن النبيــل

 من ديوان (ولد ارواح )

الصادر عن وزارة الثقافه المصريه

 

الشتا ف القلب
غير الشتا ف الشارع
غير الشتا بين اربع حيطان
غير الاحساس بالغربه
لما الواحد يترحم على اعز ما ليه
الحزن الليلادى يشبه المطاريد وخناق القطط باليل
والخلا
وغراب وحيد
زى الزنازين الفاضيه
وعساكر واقفه بتتألم
مش عارفه بتحرس مين
,الحزن النبيل
اللى حول الريح العتيه
لعروسة بحر كبيره
بتحوش كل دموع البحر لواحد مات
الحزن اللى كان نايم
ف قلوب اخواتى
ونظرة امى للسما
وعنبر العنايه المركزة
اتحرك ف بدلة الجيش القديمه
وقع برواز الحيط
هرب من زحمة البيت
ونوح العجايز
بص عالميادين الكبيره
سافر لحد بلدنا البعيده
وراح يهز النخل اللى واقف من عمر ابويا ف الصعيد
يبلغ الناس هناك
ويعلن موت المحارب
وكأن سلك التليفون مش هيقضى الموت
الحزن الجديد
اللى اتمكن ف ملامح وشى
واللى اتفرق بالعدل على كل قلوب العيله
الا الست اللى اكتشفت ف الحزن حياه
فاداها الصبر اللى يجيب الميت تانى

يطمن على اهله ويرجع

امى
من يوم ما قولنالها ان الميت بيحس
وبياخد ثواب
زى اللى بيقرا القرأن على روحه
مش عايزه تسيب المصحف
ولا عايزه تصدق
انها لا بتعرف تقرا
ولا تكتب

خالد امين

 

 

عن لشاعر الصحفى /خالد امين

x

‎قد يُعجبك أيضاً

هواوي” وstc  تناقشان آفاق التعليم الرقمي خلال قمة التعليم الافتراضية

  روافد العربية/ وسيلة محمود الحلبي    استضافت stc، الممكن الرقمي الأول في المنطقة بالتعاون ...